Anaidi e Marselini vazhdojnë të kryejnë dënimin me përpikmëri

Ndërkohë që banorët janë duke biseduar me njëri-tjetrin të mbledhur të gjithë në dhomën e ndenjes e duke bërë shaka e duke improvizuar situata humori mes njëri-tjetrit, Marselini dhe Anaidi vazhdojnë të kryejnë dënimin që u ka dhënë Vëllai i Madh për shkak të sjelljes së tyre jo korrekte dhe fjalorit të pahijshëm të përdorur kundrejt njëri-tjetrit në momente nervozizmi. Ata janë duke larë rrobat e të gjithë banorëve si edhe duke hekurosur një pjesë tjetër, ndërsa bisedojnë me qetësi herë pas here duke ndarë punët e duke bashkëpunuar, për të mbaruar dënimin sa më shpejt.

Marselini e Anaidi ndajnë punët, ku njëri merret me larjen e tjetri me hekurosjen e rrobave. Marselini, pasi i hekuros, i sistemon rrobat, duke i vendosur në varëse e duke i varur në një vend të gjitha. Ndërsa Anaidi vazhdon të merret me larjen e rrobave në banjë, ku ndërsa shikon që rrobat e palara nuk kanë të sosur, thotë duke qeshur: “Ah ç’na bëre ore Nino, ç’na bëre”.

Pas pak në banjë shkon edhe Joana, e cila e përqafon Anaidin dhe rri disa minuta duke i bërë shoqëri atij, por pa e ndihmuar në dënimin e tij, sipas urdhrit të Vëllait të Madh.