Zgjimi i banorëve ditën e sotme është më i vonshëm krahasuar me ditët e tjera. E para që zgjohet vetëm pas ndezjes së dritave dhe vendosjes së muzikës në sfond, është Eldora, e cila kujdeset për banorët, duke i ndërruar bateritë e mikrofonave. Banorët e tjerë qëndrojnë ende në gjumë për minuta të tëra.
Anaidi dhe Joana zgjohen duke përkëdhelur njëri-tjetrin, ndërsa fillojnë të qeshin me një ëndërr që ka para Anaidi gjatë natës. Ai thotë se e ka parë veten si shofer në ëndërr dhe se i ka zbritur të gjithë pasagjerët në rrugën e Durrësit. Kjo shkakton të qeshura tek Joana, por edhe tek ai vetë.
Pasi çohet Anaidi nga krevati, afër Joanës shkon Jonilda e të dyja fillojnë të flasin për ngjarjet në shtëpi. Joana tregon për marrëdhënien e trazuar me të dashurin, pasi ai nuk ka qenë dakord me hyrjen e saj në Big Brother. Jonilda e këshillon që ajo të jetë e qetë dhe të mundohet të shijojë ditët e qëndrimit të saj në Big Brother. “I kam bërë gjerat copa-copë”, thotë Joana për sa i përket lidhjes së saj jashtë, por këshillat e Jonildës duket se e qetësojnë disi. Por gjithashtu Jonilda e këshillon edhe rreth marrëdhënies që po mundohet të ndërtojë me Anaidin, duke i thënë: “Unë, nëse do të isha në vendin tënd, nuk do ta puthja nëse ai do të tentonte”. “Shikoje deri ku shkon, bëje për vete edhe për lojën”, vazhdon t’i thotë Jonilda. Joana aludon duke menduar se në shtëpi do të futet një banor tjetër dhe mendon që ta bëjë xheloz Anaidin me banorin e ri. Ndërsa Jonilda e këshillon të mos e bëjë pasi në këtë mënyrë mund ta lodhë Anaidin. Bisedat mes të dyjave vazhdojnë ende, ndërkohë që flasin për gjëra të përgjithshme.
